كنا بنعمل sales workshop  لشركة اول حاجة قالوها العميل ساعات بيكون مستفز ….. 

• • بيكلمنا كانوا شاكك فينا

• • ساعات بيسأل اسئلة غريبة

• • ساعات بيسأل اسأله تافه

• سايب الحاجات المهمة وبيسال علي حاجات مش مهمه

هل فعلا العميل مستفز؟

ده الموضوع اللي هنتكلم فيه النهاردة…..

المرة دي  موضوعنا مهم لاي حد بيتعامل مع عملاء سواء اونلاين او face to face , و مهم لاي حد عنده فريق مبيعات

خطورة المبادىء اللي هنتناقش فيها النهاردة انها لو مش واضحة عندك كل مهارات البيع اللي ممكن تتعلمها مش هتستفيد منها بسبة ميه في الميه.

المبادى اللي هنتكلم فيها دي حجر الاساس اللي بيها تقدر تطبق اي حاجة تانية هتتعلمها في ال sales

هل العميل مستفز؟

الاجابة علي السؤال ده جزئين:

• • انت شايف العميل ازاي

• انت شايف نفسك ازاي

انت شايف العميل ازاي ؟

١- العميل من حقه يسأل

اللي انت بتطلبه من العميل انه يديلك فلوسه اللي تعب فيها علشان يشتري المنتج بتاعك، طلب مش سهل يعني

لازم يتأكد ان دي حاجة مفيده ليه، من حقه يتاكد ان ده استثمار.

انت علشان ده شغلك انت متاكد انه هو هيستفيد، انما هو مش متاكد
ومن حقه يشك، ماتخدش الموضوع شخصي، دي مش اهانه ليك انه يكون شاكك في المنتج، ده حقه، ف ماتستكترش عليه الحق ده.

٢- ده دورك

دي شغلتك
انت استشاري العميل، انت تشور عليه و تعلمه،
آيا كان الصناعة بتاعتك، انت دورك الحقيقي تعلم العميل ازاي يستفيد من منتجك و ازاي المنتج ده هو اللي هيحل الاحتياج اللي عنده

حتي لو كان اللي بيسألك انت متاكد انه مش هيشتري، برضو دورك انك تساعده، لازم تنفذ وعودك والرسالة بتاعتك اللي انت قولتها في الماركتنج. غير كده مش هتكون حقيقي والعميل بسهوله يقدر يحس ده.

المبيعات بتحصل  نتيجة لتنفيذ الرسالة بتاعتك مش لما يحصل مبيعات تعمل الرسالة بتاعتك

ممكن تقرا برضه عن ازاي تبني  community للبراند بتاعك و ازاي تتواصل مع العميل 

٣- العميل طبيعي يكون محتار

هو مش متخصص زيك
هو مش مذاكر الصناعة دي
انت هتقولي منا كاتب كل حاجة علي الموقع، منا قايل تفاصيل كاملة، هو اللي مكسل يقرا !
حتي لو مكسل يقرا، دورك تعمل الشغل ده مكانه
تلخص المحتوي وتقوله الخلاصة
تعرف اللي فارق معاه واللي محيرة و ترشده للاختيار الصح
ممكن جدا يكون مش مكسل لكن معندوش وقت وعايز ياخد قرار وبيسالك علشان انت خبير

انت كل المجهود اللي بتعمله في التسويق اصلا علشان اللحظة دي
تيجي انت تقول ده مكسل؟

٤- ماتحكمش عليه اصلا

كل واحد ليه ظروفه و خلفيته و انت اصلا مش شايف كل حاجة، فدايما استنتاجك مش هيكون دقيق

كده خلصنا انت شايف العميل ازاي

انت شايف نفسك ازاي ؟

– هل شغل المبيعات او خدمة العملا حاجة تتكسف منها او تترفع عنها؟

كل الناس اللي انت عارفها شغاله sales
لما بتيجي تقنع حد برايك في اي موضوع sales
لما بتيجي تقنع مراتك تعملك قهوة الصبح sales

لما صاحب شركة يعمل اتفاق مع صاحب شركة تانية بيعمل sales

لما وزير بيعمل اتفاق مع وزير تاني برضو sales

يبقي ال سيلز هي شغل كل الناس طول اليوم كل يوم

٢-مش انت بتبيع حاجة مفيدة للعميل؟

يعني لو هو مشتراش ممكن جدا يروح لشركة تانية تضره او تضحك عليه؟
يبقي انت شغلتك انك بتقذ العميل من الخسارة
فالحقيقة هو لو مشتراش هو اللي خسران

لو انت شايف دورك كده والحقيقة دي واضحة جدا قدامك ،هتتكلم مع العميل بقوة مختلفة جدا

احنا قولنا ايه النهاردة:- 

ماقولناش اي sales skills علي فكرة
لان من غير الافكار بتاعة  موضوعنا النهاردة عملية الsales هتكون ضعيفة حتي لو انت عارف مهارات البيع
١- العميل
من حقه يسال
من حقه يحتار ويشك
انت الاستشاري بتاعه
متحكمش عليه
حبه كانه واحد من عيلتك

٢- انت دورك انك تنقذ العميل من منتج تاني ممكن يضره


لو عملت الكلام ده بكل امانة هتلاقي نتايج انت مكنتش تتوقعها، و هتتفاجئ أن تأثيرها علي البيزنس بتاعك بيحصل علي المستوي القريب وكمان بيقعد سنين.

لو عندك اي اسئلة عن الموضوع ابعتلنا في الكومنتات 🙂